స్పందనలో స్పందన కరువా?"
Famous TV - ఆంధ్రప్రదేశ్ / అన్నమయ్య ( రాయచోటి ) : పీజీఆర్ఎస్‌లో వేల ఫిర్యాదులు... కానీ ప్రజలకు దక్కుతున్నది నిజమైన పరిష్కారమా? చౌడేపల్లి (ఉత్తరాది హరిప్రసాద్ ప్రత్యేక కథనం) ప్రజల సమస్యలను వేగంగా పరిష్కరించాలనే లక్ష్యంతో ఆంధ్రప్రదేశ్ ప్రభుత్వం అమలు చేస్తున్న పబ్లిక్ గ్రీవెన్స్ రెడ్రెస్సల్ సిస్టమ్ (పిజిఆర్ఎస్ – స్పందన) వ్యవస్థపై రాష్ట్రవ్యాప్తంగా ప్రశ్నలు వ్యక్తమవుతున్నాయి. ప్రజలకు న్యాయం అందించేందుకు రూపొందించిన ఈ వ్యవస్థ, ప్రస్తుతం కేవలం గణాంకాలకే పరిమితమవుతోందా అనే సందేహాలు బాధితులు, సామాజిక వర్గాలు వ్యక్తం చేస్తున్నాయి.రెవెన్యూ, పంచాయతీ రాజ్, మున్సిపల్, పోలీస్, విద్య, వైద్యం, సంక్షేమ పథకాలు, భూ వివాదాలు, పెన్షన్లు, రేషన్, అవినీతి ఫిర్యాదులు వంటి అనేక అంశాలపై ప్రజలు స్పందన పోర్టల్ ద్వారా ఫిర్యాదులు నమోదు చేస్తున్నారు. అయితే, అనేక సందర్భాల్లో సమస్య మూలాలను పరిశీలించకుండా, బాధితుల వాదనను పూర్తిగా వినకుండా, సంబంధిత శాఖల నుంచి వచ్చిన నివేదికల ఆధారంగానే కేసులను "రిసాల్వ్డ్ " లేదా "రిడ్రస్స్డ్"గా మూసివేస్తున్నారనే ఆరోపణలు వినిపిస్తున్నాయి. క్షేత్రస్థాయిలో పరిశీలన జరుగుతోందా? బాధితుల వాదన ప్రకారం, ఫిర్యాదు నమోదు అయిన తరువాత సంబంధిత అధికారులు ప్రత్యక్షంగా స్థల పరిశీలన చేయకుండా, కార్యాలయాల్లోనే నివేదికలు తయారు చేసి కేసులను ముగిస్తున్న ఘటనలు ఉన్నాయని చెబుతున్నారు.కొందరు ఫిర్యాదుదారులు తమను సంప్రదించకుండానే సమస్య పరిష్కరించినట్లు నమోదు చేశారని ఆరోపిస్తున్నారు. గణాంకాల కోసం పరుగు? పరిపాలనలో పెండింగ్ ఫిర్యాదులు తగ్గించడం, పరిష్కార శాతం పెంచడం కోసం అధికారులపై ఒత్తిడి ఉంటుందనే అభిప్రాయాలు వినిపిస్తున్నాయి. దీనివల్ల వాస్తవ పరిష్కారం కంటే ఫైళ్లలో పరిష్కారం చూపడానికే ప్రాధాన్యత ఇస్తున్నారనే విమర్శలు ఉన్నాయి. సమస్య అలాగే కొనసాగుతున్నప్పటికీ, ప్రభుత్వ రికార్డుల్లో మాత్రం అది ముగిసినట్లు నమోదవుతోందని బాధితులు ఆవేదన వ్యక్తం చేస్తున్నారు. ప్రజలు చెబుతున్నది ఇదే... "ఫిర్యాదు చేశాం పరిష్కారం కాలేదు.కానీ పోర్టల్‌లో మాత్రం 'రిసాల్వ్డ్ ' అని చూపిస్తున్నారు." "అధికారిని కలవమంటారు.అధికారి మరో కార్యాలయానికి పంపిస్తారు.చివరికి స్పందనలో కేసు ముగిసిందని మెసేజ్ వస్తుంది." ఇలాంటి ఫిర్యాదులు వివిధ ప్రాంతాల నుంచి వినిపిస్తున్నాయని పలువురు పేర్కొంటున్నారు. నమ్మకం దెబ్బతింటుందా? ప్రజల సమస్యలకు చివరి ఆశగా భావించిన స్పందన వ్యవస్థపై విశ్వాసం దెబ్బతింటే, ప్రభుత్వంపై ప్రజల్లో నమ్మకం కూడా దెబ్బతినే ప్రమాదం ఉందని పరిపాలనా నిపుణులు అభిప్రాయపడుతున్నారు. ఫిర్యాదుదారుడి సమ్మతి లేకుండా కేసు మూసివేయడం, సమస్య వాస్తవంగా పరిష్కారమైందా లేదా అనే అంశాన్ని ధృవీకరించకపోవడం వంటి అంశాలపై సమీక్ష అవసరమని సూచిస్తున్నారు. సంస్కరణలు అవసరమా? పీజీఆర్ఎస్ వ్యవస్థను మరింత పారదర్శకంగా మార్చేందుకు నిపుణులు కొన్ని సూచనలు చేస్తున్నారు.ఫిర్యాదుదారుడి సంతృప్తిని తప్పనిసరిగా నమోదు చేయాలి.ప్రతి ఫిర్యాదుపై క్షేత్రస్థాయి ధృవీకరణ నివేదిక ఉండాలి.తప్పుడు పరిష్కార నివేదికలు ఇచ్చిన అధికారులపై బాధ్యత నిర్ధారించాలి.స్వతంత్ర పర్యవేక్షణ వ్యవస్థను ఏర్పాటు చేయాలి.అప్పీల్ విధానాన్ని మరింత సమర్థవంతంగా అమలు చేయాలి.ప్రభుత్వం స్పందించాల్సిన సమయం ఇదే ప్రజల సమస్యలు కేవలం ఆన్‌లైన్ రికార్డుల్లో ముగియకూడదు. ప్రభుత్వ లక్ష్యం గణాంకాల్లో "100 శాతం పరిష్కారం" చూపడం కాకుండా, ప్రజల జీవితాల్లో "100 శాతం న్యాయం" కనిపించేలా ఉండాలని పలువురు కోరుతున్నారు.
Admin
Famous TV
మరిన్ని వార్తలు
Developed By :
